મોરબી તાલુકા પોલીસે નેકસેસ સિનેમા પાસેથી એક ઇંગ્લિશ દારૂ ભરેલ સ્વીફટ કારનો પીછો કરી કુબેર ફાટક પાસેથી સ્વીફટ કારને ઝડપી પાડી હતી. જ્યારે કારચાલક ઈસમ કારને રેઢી મુકીને નાશી છુટ્યો હતો. જેથી પોલીસે ઈસમ વિરૂદ્ધ ગુન્હો નોંધી ઝડપી લેવા તજવીજ હાથ ધરી છે.
મળતી વિગતો મુજબ મોરબી તાલુકા પોલીસ મથકના પીઆઈ એસ.કે.ચારેલની સુચના હેઠળ મોરબી તાલુકા પોલીસ પેટ્રોલિંગમાં હતી. તે દરમિયાન પોલીસને એક સફેદ કલરની મારૂતી સુઝુકી કંપનીની સ્વીફટ કાર રજીસ્ટર નંબર- GJ36-8-727 જે ગાડીમાં ઇંગ્લીશ દારૂ ભરી નવલખી બાયપાસ રોડ થઈ મોરબી તરફ આવતી હોવાની બાતમી મળી હતી. જેથી નવલખી બાયપાસ ખાતે નેકસેસ સિનેમા સામે પોલીસે વોચ ગોઠવી હતી. તે દરમ્યાન સ્વીફટ કાર આવતા ઇસમ કાર ચાલક પોતાની કાર યુ-ટર્ન મારી ભગાવીને કુબેર ફાટક પાસે સ્વીફટ કાર મુકી નાસી ગયેલ હતો. કારમાંથી ઇગ્લીશ દારૂની બોટલ નંગ.151 (કિ.રૂ.53,756) તથા સ્વીફટ કાર મળી કુલ કિ.રૂ.3,53,756 નો મુદ્દામાલ કબ્જે કરી આરોપી વિરૂધ્ધ મોરબી તાલુકા પોલીસ સ્ટેશન ખાતે પ્રોહીબીશન એકટ હેઠળ ગુન્હો નોંધી કાર્યવાહી કરેલ છે.
